Гандбол. Олмалиқда Ўзбекистон чемпионати давом этмоқда

Аёллар ўртасидаги баҳсларда пешқадамлик қилаётган Олмалиқнинг ОКМК жамоаси Самарқанднинг “Булунғур” гандболчиларидан 35:30 ҳисобида устун келди. Тошкент шаҳри номидан қатнашаётган Ўзбекистон ёшлар терма жамоаси Андижон ОЗК қўл тўпи усталарига 25:33 ҳисобида ютқазди. 

Наманган ва Сирдарё вилояти жамоалари ўртасидаги учрашувда водийлик гандболчилар битта тўп фарқи билан 37:36 ҳисобида устун келишди. Қашқадарёнинг “Ғузор” жамоаси қорақалпоғистонлик ҳамкасбларини 29:14 ҳисобида мағлуб этди. 

Эркаклар жамоалари ўртасидаги мусобақада ҳам Олмалиқнинг ОКМК жамоаси пешқадамлик қиляпти. Мезбонлар бу сафар асосий рақиблардан бири Республика олимпия захиралари коллежи жамоасини 36:28 ҳисобида енгишди. Навоийнинг “Сўғдиёна”си Сирдарё вилояти жамоасига 24:26 ҳисобида имкониятни бой берди.