Гэтжи Махачев билан жанг учун UFC чемпионлик камаридан воз кечмоқчи

Бу ҳақда ҳам америкалик, ҳам россиялик жангчининг ишларини юритувчи менежер Али Абдель-Азиз маълум қилди.

"Агар Жастин Гэтжи фақат битта жангни танлаши керак бўлса, мен у энг катта рақибни ва номи ёнида энг катта чек турган жангни танлашини истайман. Бу шарт эмас, унинг ўз чемпионлик камари учун жанг бўлиши керак. Бу ярим ўрта вазн чемпионлиги ёки BMF камари учун жанг бўлиши мумкин. Асосийси – ким унга энг кўп ноллари бор чекни таклиф қилади.

Менимча, енгил вазн тоифасидаги топ-жангчилардан ҳеч бири Жастин Гэтжи меросига янги нарса қўша олмайди. Чарльз Оливейра? У неча марта таслим бўлган. Арман Царукян, эҳтимол, дивизиондаги энг қийин рақиб ва катта эҳтимол билан келажакда чемпион бўлади. Макс Холлоуэй Жастинни мағлуб этди – майли. Лекин мен ҳозир худбинлик билан фикр юритяпман: агар Илия ғалаба қозонганида, у кейинги жангини Исламга қарши ўтказган бўларди. Ўйлайманки, агар Жастин Гэтжи Ислам билан жанг қилишни хоҳласа, у бу жангни олиши мумкин. Нега энди йўқ? Шунда у енгил вазндаги чемпионлик камарини бўшатади. Агар бу жанг унга энг катта гонорар келтирса, демак, айнан шу жангни олиши керак", – деди Абдель-Азиз "Pound 4 Pound" подкастининг навбатдаги сонида.

Июнь ойида Илия Топуриядан енгил вазн чемпионлик камарини тортиб олган Жастин Гэтжи жорий йилда октагонга чиқмоқчи эмаслигини маълум қилган эди. Ислам Махачев эса бир ҳафтадан сўнг Филадельфияда бўлиб ўтадиган UFC 330 турнирида ярим ўрта вазн тоифасидаги чемпионлик камарини ирландиялик Йен Мачадо Гэррига қарши ҳимоя қилади.