Гоффин Монпельеда тенгсиз бўлди

Open Sud de France турнирининг ҳал қилувчи финал учрашувида дунёнинг 15-ракеткаси бўлиб турган бельгиялик Давид Гоффин рейтингда ўзидан икки поғона юқорида бораётган испаниялик Роберто Баутиста-Агутни мағлубиятга учратди - 5/7, 6/4, 6/2.

Икки соату 5 дақиқа давом этган бахсда Давид 13, Роберто эса 7 та эйс зарбани амалга оширди. Ўзаро учрашувларда Гоффин 4:3 ҳисобида олдинга чиқиб олди. Бу унинг мавсумдаги биринчи, фаолиятидаги бешинчи соврин бўлди. 

Монпельедаги муваффақиятли иштирок бельгиялик теннисчига 21,655 евро мукофот пули ҳамда 250 рейтинг очкосини тақдим этди. Роберто эса бу турнирдан 16,000 евро ва 150 очко ишлаб олди.