08 фев 10:01
Янгиликлар

Бокс/ММА

Ғоибназаров Пакьяо ва Кроуффорд билан бир оқшомда жанг ўтказиши мумкин

Дунёга машҳур Top Rank промоутерлик компанияси байроғи остида ўз жангларини ўтказиб келаётган ҳамюртимиз Фазлиддин Ғоибназаровнинг навбатдаги жанги катта эҳтимол билан 14 апрель куни бўлиб ўтади.

Бу маълумотни бизга компания раҳбари Боб Арум билан суҳбатда бўлган Ғоибназаровнинг мураббийи Аброр Турсунпўлатов тақдим этди. Унинг сўзларига қараганда, Фазлиддин афсонавий боксчи, 8 вазн тоифасида собиқ жаҳон чемпиони Мэнни Пакьяо билан бир оқшомда жанг ўтказар экан.

Айнан 14 апрель санасида Пакьяодан чемпионлик камарини тортиб олган австралиялик Жефф Хорн бирлаштирувчи чемпионлик жангида америкалик Теренс Кроуфордга қарши рингга кўтарилади. Боб Арум шу бокс оқшомида Пакьяо ва Майк Альварадо ўртасида ҳам жанг ташкил қилмоқчи бўляпти.

Боб Арумнинг режасига кўра, агар Пакьяо ушбу жангда ғалаба қозонса, кейинчалик Хорн - Кроуфорд жуфтлиги ғолиби билан тўқнаш келади. Рио Олимпиадаси чемпиони бўлган Фазлиддин Ғоибназаров ҳам айнан 14 апрелда шу бокс кечасида рингга чиқиши керак.