Ғолибга 50 миллион ваъда қилинган кураш гиламида маликалар беллашади

Ушбу мусобақада Қорақалпоғистон Республикаси, Тошкент шаҳри ва барча вилоятлардан иштироки кутилаётган хотин-қизлардан иборат терма жамоалар 48кг, 57кг, 63 кг, 70кг +70 кг вазн тоифаларида жамоавий баҳсларда куч синашишади.

Мусобақани ташкил этишдан мақсад - 8 март - Халқаро хотин-қизлар байрами муносабати билан, шунингдек, олис ўтмишдан бизгача етиб келган қадриятимиз, хусусан, мардлик, жасурлик, ватанпарварлик каби ғояларни ўзида мужассам этган миллий спортимиз бўлган курашни янада ривожлантириш, бу қадриятимизни умумжаҳон спорт дурдонасига айлантириш, хотин-қизлар ўртасида курашни янада оммалаштиришдан иборат.

Таъкидлаш жоиз, мусобақа ғолиб ва совриндорларига "Кураш маликалари кубоги" рамзи туширилган кубок, диплом ва қимматбаҳо эсдалик совғалари топширилади. Шу билан бир қаторда шохсупадан жой олишга муваффақ бўлган жамоалар қуйдаги пул мукофотлари билан тақдирланишади:

1- ўрин: 50 000 000 (эллик миллион) 

2-ўрин: 30 000 000 (ўттиз миллион) 

3-ўрин: 10 000 000 (ўн миллион) 

Кураш федерацияси матбуот хизмати маълумотига асосан Илҳом РАҲМОНОВ тайёрлади