Goygol Cadet European Cup турнирининг илк кунидаёқ 2 та медаль қўлга киритдик, 1 таси олтин!

Дунёнинг 14 давлатидан 323 нафар дзюдочи қатнашаётган ушбу турнирда Тоҳир Файзиев мураббийлигидаги кадетларимиз юртимиз шарафини ҳимоя қилишяпти. Мусобақанинг илк куни икки дзюдочимиз медаллар учун баҳс олиб борди. Улардан Баҳром Асатов (-60 кг) барча рақибларини енгиб, чемпионлик шоҳсупасига кўтарилди. Шодиёр Шавкатов (-50 кг) эса бронза медалига сазовор бўлди.  

-50 кг вазнда юртимиз шарафини ҳимоя қилган Шодиёр Шавкатов илк даврада мезбонлар вакили Иброҳим Резазадени мағлуб этди. Чорак финалда нейтрал мақомда курашган Нарт Нагучевга ютқазиб қўйди. Бронза медали йўлидаги ўтиш беллашувларида грузиялик Бориси Чадунели ҳамда озарбайжонлик Али Азимлидан устун келди. Бронза медали учун кечган баҳсда эса франциялик Аксел Кукни мағлубиятга учратди. 

-60 кг вазндаги дзюдочимиз Баҳром Асатов биринчи даврада грузиялик Тсотне Ичкитидзе, иккинчи босқичда словениялик Гал Блазич, 1/4 финалда озарбайжонлик Мирҳалиг Искандаров, 1/2 финалда грузиялик Гиги Кеквиашвили, финалда эса озарбайжонлик Фарид Гараевни мағлуб эта олди.