Grand Chess Tour: Синдаров Прагг билан ўйнади, 5 та партиядан фақат 1 тасида дуранг қайд этилди

Дунёнинг кўзга кўринган гроссмейстерлари иштирок этаётган турнир классик шахмат йўналишида 9 турдан иборат айланма тизимида ўтказиляпти. Биринчи турда Жавоҳир Синдаров америкалик Левон Аронянга қарши оқ доналарда ўйнаб, дуранг натижа қайд этганди. 

Иккинчи турда эса Жавоҳир қора доналарда сўнгги пайтлардаги асосий рақибига айланиб бораётган ҳиндистонлик Рамешбабу Праггнанандҳага қарши баҳс олиб борди. Дурангга қараб кетаётган драматик учрашув якунида Прагг ғалабани ўз томонига оғдириб олди. Яна учта партияда ғалаба қайд этилди. Фақат бир учрашув дуранг натижа билан якунланди. Нидерландиялик Аниш Гири америкалик Фабиано Каруана билан муросага келди. 

Бугун 3-турда Жавоҳир Синдаров оқ доналарда франциялик Максим Вашье-Лагравга қарши баҳс олиб боради. Бугунги учрашувлар ҳам бизнинг вақт билан соат 22:00да бошланади. Беш нафар иштирокчи - Фабиано Каруана, Уэсли Со, Рамешбабу Праггнанандҳа, Левон Аронян ва Максим Вашье-Лаграв 1,5 очкодан жамғариб, Топ-5`таликдан жой олган. Аниш Гири 1 очко билан 6-ўринни банд этган бўлса, Жавоҳир Синдаров 0,5 очко билан қўшимча кўрсаткичларга кўра 7-поғонада бормоқда. Фақат Йорден ван Форест ҳозирча очко олмаган, у иккала учрашувда ҳам мағлубият аламини тотиб кўрди.  

Тўлиқ иштирокчилар таркиби: Жавоҳир Синдаров (Ўзбекистон), Фабиано Каруана (АҚШ), Прагнанандҳаа Рамешбабу (Ҳиндистон), Уэсли Со (АҚШ), Левон Аронян (АҚШ), Аниш Гири (Нидерландия), Винсент Кеймер (Германия), Максим Вашье-Лаграв (Франция), Йорден ван Форест (Нидерландия), Сэм Севьян (АҚШ).