Grand Chess Tour: Super Chess Classic Romania 2026. Синдаров сўнгги ўринни тарк этди, бугун пешқадамга қарши баҳс!

Мусобақада юқори рейтингга эга ўн нафар гроссмейстер бош соврин ҳамда катта мукофот пуллари учун баҳсга киришди. Улар орасида "Номзодлар турнири" ғолиби Жавоҳир Синдаров ҳам бор. Ҳамюртимиз 3-турда қора доналарда франциялик пешқадам Максим Вашье-Лагравга қарши баҳс олиб бориб, тезкор дурангга имзо чекди. Партия бир соатдан сал кўпроқ давом этди. 

Учинчи турда нидерландиялик дуранглар қироли Аниш Гири ғалабага эришди ва турнир жадвалида 2 очко билан қўшимча кўрсаткичларга кўра пешқадамликни қўлга олди. У франциялик Алиреза Фирузджани таслим этган. Учинчи турнинг иккинчи ғалабасига яна бир нидерландиялик шахматчи Йорден ван Форест эришди. У руминиялик Богдан-Даниэль Дикни мағлубиятга учратди. Қолган партиялар дуранг натижа билан якунланди.   

Турнир жадвалида бир йўла беш нафар гроссмейстер 2 очкодан жамғариб, пешқадамлик қиляпти. Қўшимча кўрсаткичларга кўра Гири карвошбоши, кейинги ўринларни Йорден ван Форест, Максим Вашье-Лаграв, Рамешбабу Праггнанандҳа ва Винсент Кеймер банд этган. 

Бугун 4-турда Жавоҳир Синдаров оқ доналарда карвонбоши Аниш Гирига қарши баҳс олиб боради. Бугунги учрашувлар ҳам бизнинг вақт билан соат 18:00да бошланади. Чемпион 100 000 долларни қўлга киритади.