Grand Swiss. Гроссмейстерларимизнинг барида дуранг

Турнирнинг умумий мукофот жамғармаси 600 000 (460 000 эркаклар, 140 000 аёллар учун) АҚШ долларини ташкил этиб, унда дунёнинг 164 (114 эркак, 50 аёл шахматчилари) нафар гроссмейстерлари ғолиблик йўлида дона суришяпти. Улар қаторида ҳамюртларимиздан Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидовлар ҳам ўз имкониятларини синаб кўришмоқда.

Мусобақа швейцарча тизимда ўтказилаётган бўлиб, кеча гроссмейстерлар 8-турда ўзаро муносабатларига ойдинлик киритиб олишди. Бу турда ҳамюртларимизнинг бари ўз партияларини дуранг билан якунлашди. Шахматчиларимиз орасида энг яхши натижа қайд этиб турган Жавоҳир Синдаров (2658) қора доналарда рейтингда ўзидан юқорида турган англиялик Никита Витюгов (2711) билан муросага келди. 

Нодирбек Якуббоев (2616) оқ доналарда рейтингда ўзидан юқорида жойлашган Праггнанандҳа (Ҳиндистон, 2738) билан дуранг ўйнади. Биринчи рақамли шахматчимиз Нодирбек Абдусатторов (2716) оқ доналарда ўйнашига қарамай, Иван Сарич (Хорватия, 2647) қаршилигини синдира олмади. Шамсиддин Воҳидов (2578) эса оқ доналарда Руслан Пономарёв (Украина, 2641) билан дурангга имзо чекди. 

Олти нафар шахматчи 8 имкониятдан 6 очкодан жамғариб, турнир жадвалида қўшҳокимлик қилишяпти. Жавоҳир Синдаров 5 очко билан 15-ўринни банд этган. Тўрт ярим очкога эга Нодирбек Якуббоев 26-поғонага кўтарилди. Нодирбек Абдусатторов 4,5 очко билан қўшимча кўрсаткичларга кўра 41, 3,5 очкога эга Шамсиддин Воҳидов эса 114 иштирокчи орасида 81-поғонадан жой олган. Бугун шахматчилар 9-тур учрашувларида юзма-юз келишади. 

Бугун ўтказиладиган 9-тур жуфтликлари:

Жавоҳир Синдаров (2658) - Максим Вашье-Лаграв (Франция, 2727)

Беньямин Гледура (Венгрия, 2633) - Нодирбек Абдусатторов (2716)

Сэм Шанкланд (АҚШ, 2698) - Нодирбек Якуббоев (2616)

Кирил Шевченко (Руминия, 2671) - Шамсиддин Воҳидов (2578)