Grand Swiss. Икки гроссмейстеримизда мағлубият, яна иккисида дуранг

Турнирнинг умумий мукофот жамғармаси 600 000 (460 000 эркаклар, 140 000 аёллар учун) АҚШ долларини ташкил этиб, унда дунёнинг 164 (114 эркак, 50 аёл шахматчилари) нафар гроссмейстерлари ғолиблик йўлида дона суришяпти. Улар қаторида ёш гроссмейстерларимиздан Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидовлар ҳам ўз имкониятларини синаб кўришмоқда.

Мусобақа швейцарча тизимда ўтказилаётган бўлиб, кеча гроссмейстерлар 7-турда ўзаро муносабатларига ойдинлик киритиб олишди. Шахматчиларимиз орасида энг яхши натижа қайд этиб турган Жавоҳир Синдаров (2658) оқ доналарда рейтингда ўзидан юқорида турган ҳиндистонлик Гужратҳи Видит (Ҳиндистон, 2716)га имкониятни бой бериб қўйди. Тур олдидан 2-ўринни эгаллаб турган Синдаров кечаги мағлубиятдан сўнг 13-поғонага тушиб кетди. Бу унинг мусобақадаги илк мағлубияти бўлди. Видит аксинча, Жавоҳир устидан қозонган ғалабаси эвазига 5,5 очко билан якка пешқадамга айланиб олди. 

Нодирбек Якуббоев (2616) қора доналарда рейтингда ўзидан юқорида жойлашган руминиялик Богдан-Даниэль Дяк (Руминия, 2701)га ютқазиб қўйди. Биринчи рақамли шахматчимиз Нодирбек Абдусатторов (2716) эса бу турда қора доналарда Евгений Наер (Россия, 2648) билан муросага келди. Шамсиддин Воҳидов (2578) ҳам қора доналарда Амин Бассем (Миср, 2680) билан дурангга имзо чекди. 

Ўн бир нафар шахматчи 7 имкониятдан 5 очкодан жамғарган. Синдаров 4,5 очко билан 13-ўринга, 4 очкога эга Нодирбек Якуббоев 10-ўриндан 29-поғонага пастлади. Нодирбек Абдусатторов 4 очко билан қўшимча кўрсаткичларга кўра 38, 3 очкога эга Шамсиддин Воҳидов эса 114 иштирокчи орасида 81-поғонадан жой олган. Бугун шахматчилар 8-тур учрашувларида юзма-юз келишади.