Гвардиола 5:0 га қарамай, “Ман Сити” футболчиларини танқид қилди

Учрашувдан кейин “шаҳарликлар” устози ўз фикрлари билан ўртоқлашди.

“Баъзи футболчилар одатдагидан кўра ёмонроқ ўйнашди, тўпни осон йўқотдик. Шу билан бирга бугун жуда совуққон ҳаракат қилдик.

Дастлабки 7 дақиқаликда “Спортинг” қанчалар яхши эканини кузатдик. Менга ишонинг жамоалар ўртасидаги фарқ 5:0 га тўғри келмайди.

Футболда бир қоида бор: тўп сенда бўлса, уни йўқотмасликка ҳаракат қил, айниқса, осон вазиятларда. Биз эса кўп ҳолларда уни йўқотдик. Бу Европанинг топ жамоаларига қарши ўйинларда содир бўлса, рақиблар қарши ҳужумга ўтиш имконига эга бўлади. Янада кучайишимиз лозим.

“Спортинг” – фантастик жамоа, Португалия чемпиони. Улар қанчалик яхши, ажойиб жамоалигидан хабардорман.

Жуда хурсандман деб айта оламан, чунки кейинги босқичга чиқиш учун катта қадам ташладик. Бироқ, бу эндигина биринчи ўйин. Қойилмақом натижа, лекин чорак финалга йўл олиш учун яна бир учрашувни ўтказиш керак.

Ўйинчилар иш услубимни билишади. Янада ривожланиб боришимиз зарур. Ишонинг, жуда хурсандман, аммо бундан ҳам зўрроқ бўлишга қодирмиз”, дейди испаниялик мутахассис.