Ҳакамлар ҳамюртимиздан чуқур нокдаунга учраган Постолга ғалабани тақдим этишди

Оқшомнинг марказий жанги ҳамюртимиз иштирокида бўлиб ўтди. Фаолиятида мағлубият нималигини билмай келаётган Жамшид Нажмиддинов ярим ўрта вазн тоифасида собиқ WBC чемпиони украиналик Виктор Постолга қарши рингга кўтарилди.

Ўн раундга мўлжалланган жанг ғолиби очколар ҳисобига кўра аниқланди. Бешинчи раундда Жамшид ўзининг кучли зарбаси билан Постолни чуқур нокдаун ҳолатига тушириб қўйди. Лекин вазиятдан чиқиб кета олди.

Ҳакамлар 10 раундлик жанг якунида 97:92, 97:92, 98:92 ҳисобида баҳсли ғалабани мезбон боксчига тақдим этишди. Постол сўнгги бор 2016 йилнинг июлида рингга чиққан ва ўшанда ўз чемпионлик камарини ҳозирда мутлоқ жаҳон чемпиони бўлган америкалик Теренс Кроуффордга ютқазганди.  

Маълумот учун, Нажмиддинов кечаги жанггача 14 та жанг ўтказган ва уларнинг барчасида ғалаба қозонганди. Ҳисобида 9та нокаут бор эди. Виктор Постол эса 29 та жангдан 28 тасида ғалабага эришганди.