Ҳамюртимизга Лондон Олимпиадасининг бронза медали олиб берилиши мумкин

Аниқроғи, 2012 йилги Лондон Олимпиадасида иштирок этган беш нафар оғир атлетикачидан олинган таҳлиллар Халқаро Олимпия қўмитаси томонидан қайта ўтказилган допинг текширувида ижобий натижа берган.

Қайд этилишича, допинг тестига ижобий реакция берган намуналардан бири ўша мусобақада 105 кг вазн тоифасида тўртинчи ўринни олган ўзбекистонлик Руслан Нурудиновга тегишли. 

Шунингдек, 2012 йилги олимпия ўйинларининг -105 кг вазн тоифасидаги чемпиони украиналик Алексей Торохтий, -56 кг.да бронза медали соҳиби озарбайжонлик Валентин Христов, мос равишда 8- ва 14-ўринни эгаллаган беларуслик Николай Новичков ҳамда арманистонлик Мелин Далузян ҳам ушбу қора рўйхатда бор.

Халқаро оғир атлетика федерацияси номлари тилга олинган беш спортчини вақтинчалик ҳар қандай фаолиятдан четлаштирган. Агар қарор ўз кучида қоладиган бўлса, ўша Олимпиадада 5-ўринни эгаллаган яна бир ҳамюртимиз Иван Ефремовга бронза медали тақдим этилади. Эронлик алтет Олимпиада чемпионига айланади, польшалик Бонк эса ўзининг бронзасини кумушга алмаштириб олади. 

Маълумот учун, бир неча ой олдин Иван Ефремов АҚШга жўнаб кетган. Биздаги маълумотларга кўра, ҳозирда у Америка клубларининг бири билан шартнома имзолаган ва ушбу клуб шарафини ҳимоя қилмоқда. 

  

Аввалроқ сўнгги олимпия ўйинлари давомида допинг истеъмол қилиш ҳолатлари оғир атлетикачилар орасида кўплаб кузатилаётгани туфайли спортнинг бу тури Олимпиада дастуридан чиқариб юборилиши мумкинлиги маълум бўлганди. Ушбу масала ноябрь ойи охирида Халқаро Олимпия Қўмитаси Ижроқўмида муҳокама қилинган, аммо якуний қарорни қабул қилиш кейинроққа қолдирилган.