Ҳасанбой Дўсматовнинг кейинги рақиби аргентиналик боксчи бўлади — boxrec

Нуфузли boxrec порталининг маълум қилишича, Дўсматов Қирғизистоннинг Бишкек шаҳрида ташкил этиладиган проф бокс оқшоми доирасида рингга кўтарилади.

Унга аввал хабар қилинганидек, пуэрто-риколик Жонатан Гонсалес эмас, Аргентина вакили Жоэль Агустин Контрерас рақиблик қилади.

Аввалроқ, Жонатан Гонсалес билан жанг WBA Interim камари учун ўтказилиши айтилганди, бироқ Гонсалес бошқа жанг бўйича келишувга эришгани учун унинг Ҳасанбой билан баҳси бекор қилинган эди.

Дўсматов айни дамда WBA рейтингида олтинчи ўринни эгаллаб турибди. Жоэль Агустин Контрерас эса ушбу рейтингда еттинчи поғонада қайд этилган.

Маълумот учун, Ҳасанбой Дўсматов проф фаолияти давомида ҳозиргача 7 та жанг ўтказиб, барчасида ғалаба қозонган. Контрерас ҳисобида 11 та ғалаба ва 1 та мағлубият бор.