"Ҳумо" илк мавсумидаёқ плей-оффда чемпионлик учун курашади

Тўғридан-тўғри асосий рақиб устидан қозонилган ушбу ғалаба тарихий аҳамиятга эга бўлди. Боиси, "Ҳумо" Олий хоккей лигасидаги ўзининг илк мавсумидаёқ плей-офф йўлланмасини қўлга киритди. Бу йўлда "Ҳумо"га халал бериши мумкин бўлган ягона жамоа "Тамбов" ўз майдонида "Ростов"га қарши кечган учрашувда очко йўқотди. "Ҳумо" энг яқин таъқибчисидан 10 очкога ўзиб кетди.

Шу тариқа, 2020 йилнинг 5 февраль санаси Ўзбекистон хоккейси учун тарихий кунга айланди. Чемпионлик йўлидаги плей-офф ўйинлари олимпия тизимида ўтказилиб, мағлуб жамоа курашдан чиқади. Лекин чемпионат баҳслари ҳали якунланмади. "Ҳумо" шанба куни сўнгги сафар ўйинларига жўнаб кетади. Хоккейчиларимиз 10 февраль куни Нижний-Новгородда маҳаллий "Торпедо-Горький" клубига қарши музга чиқишади.