"Ҳумо": ортда қолган 24 та ўйинга оид қизиқарли фактлар

Тошкентнинг "Ҳумо" хоккей клуби Қозоғистон Про-Лигасида 24-тур якунларига кўра, мусобақа жадвалидаги иккинчи ўринни сақлаб қола олди. Жамоа айни дамда бир ойлик уй ўйинлари сериясини ўтказиш мақсадида Тошкентда бўлиб турибди.

"Қанотлилар" шу пайтгача:

— 24 та ўйинда (12 таси уйда, 12 таси сафарда) 34 очко. 17 та ғалаба, 4 таси овертаймда, 7 та мағлубият. Шайбалар нисбати — 84-44. Турнир жадвалида 2-ўрин;

— Лигада айни дамгача овертаймда энг кўп ғалаба қозонган жамоа;

— 24 та ўйиндан 21 тасида "Ҳумо" ҳисобни очган. Бир маротаба "Сариарка" ҳисобни очган, аммо тошкентликлар 9 сониядан сўнг ҳисобни тенглаштиришган. Қолган икки учрашувда рақиблар ҳисобни очишган, аммо "Ҳумо" ғалабани "илиб кетган";

— "Қанотлилар" кетма-кет саккиз учрашувда ғалаба қозонишди. Бу "Сариарка"дан кейинги энг яхши натижадир;

— Жамоа Қозоғистон Про-Лигасининг 24-турига келиб, 44 та шайба ўтказиб юборган. Бу чемпионатнинг энг яхши натижасидир;

— Мусобақа пешқадами "Сариарка"ни мағлуб этган ягона жамоа ҳозиргача "Ҳумо" бўлиб турибди;

— Вадим Кравченко - энг яхши бомбардир - 21 очко (12+9). Шунингдек, Максим Трунёв ҳам ҳудди шунча очко жамғарган (6+15).

Жамоа навбатдаги ўйинини мусобақа жадвалидаги рақобатчиларидан бири "Арлан" жамоасига қарши ўтказади. Учрашув 9 декабрь куни 19:00да "Ҳумо Арена"да бошланади.