"Ҳумо" сўнгги уй учрашувида муҳим ғалабага эришди

Бу сафар хоккейчиларимизга Твернинг "Динамо" жамоаси рақиблик қилди. Голларга бой бўлган ўйинда дарвозаларга жами 9 та шайба киритилди. Учрашувни 0:2 ҳисобида бой бераётган "Ҳумо" хоккейчилари якунда иродали ғалабага эришишди - 5:4. 

Бугун "Ҳумо" сафида киритилган голларга Александр Шербина, Алексей Пепеляев, Платон Попов ва жамоа дирижёри Михаил Анисин муаллифлик қилди. Шербина дублга эришди. 

Бугун "Ҳумо Арена"га мавсумдаги энг кўп мухлис ташриф буюрди. Ўйин якунланиши билан мухлислар ўзлари билан бирга олиб келган юмшоқ ўйинчоқларни музга улоқтиришди. Ўйинчоқлар ва бугунги ўйин чипталари сотувидан тушган маблағ тўлалигича ҳаста болакайларга совға қилинади. 

Маълумот учун, "Ҳумо" кейинги учта ўйинни сафарда ўтказади. Евгений Попихин шогирдлари энди "Ҳумо Арена"да плей-офф босқичидаги уй учрашувларини ўтказишлари мумкин бўлади.