Ҳумоюн Султонов Чандигарҳ турнири бош соврини учун кортга чиқади

Мукофот жамғармаси 15 000 долларни ташкил этувчи ушбу турнирда ҳамюртимиз Ҳумоюн Султонов ҳам ўз имкониятини синовдан ўтказяпти. Мамлакатимизнинг биринчи ракеткаси бироз аввал якунига етган 1/2 финал баҳсида ортиқча қийинчиликсиз ғалабага эришиб, мусобақанинг ҳал қилувчи финал учрашувига йўл олди. 

Чандигарҳ турнирида биринчи рақам остида таснифланган Султонов финал остонасида мусобақанинг учинчи ракеткаси, ҳиндистонлик Мукунд Сасикумарни 6/2, 6/1 ҳисобида мағлубиятга учратди. Ҳумоюн учрашув давомида 11, Мукунд эса 4 та эйс зарбасини амалга оширган.  

Эртага Ҳумоюн Чандигарҳ турнири бош соврини учун яна бир мезбон теннисчи Рамкумар Раманатанга қарши кортга чиқади. Турнирнинг иккинчи ракеткаси ҳисобланган Рамкумар бугун 1/2 финалда мусобақада тўртинчи рақам остида ҳаракат қилган вьетнамлик Нам Хоанг Лидан 6/3, 6/2 ҳисобида устун келди.    

Таққослаш учун, Ҳумоюн Султонов ATP рейтингида 331, Сасикумар 427, Раманатан эса 410-поғонадан жой олган.