Ига Свёнтек WTA Якуний турнири ғолибаси, у мавсумни дунёнинг 1-ракеткаси сифатида якунлайди + ФОТО

Ҳал қилувчи финал учрашувида дунёнинг иккинчи ракеткаси, польшалик Ига Свёнтек WTA рейтингида бешинчи поғонадан жой олган америкалик Жессика Пегулага қарши кортга чиқди. Бир дақиқаси кам бир соат давом этган баҳсда Ига рақибасини "сочиб" ташлади - 6/1, 6/0. 

Теннис маликаларининг ўзаро учрашувида Свёнтек 6:3 ҳисобида олдинда бормоқда. Ига финал баҳси давомида 1 та эйс, ё та қўшхато ва 5 та брейк қайд этди. Свёнтек мавсумдаги олтинчи, фаолиятидаги 17-совринини қўлга киритди. У илк бор WTA Якуний турнирида чемпион бўлди. 

Канкундаги муваффақиятли иштирок Игага 1500 рейтинг очкоси ҳамда 1 миллион 476 минг АҚШ доллари миқдорида мукофот пули келтирди. Бугунги чемпионлиги эвазига у Арина Соболенкони ортда қолдириб, дунёнинг биринчи ракеткасига айланади ва мавсумни шу мақомда якунлайди.