IJF бош директори билан ҳамкорлик масалалари муҳокама қилинди

Тадбирда Спорт вазири Адҳам Икрамов, Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов, федерация бош котиби Азиз Собиров иштирок этди.

Учрашувда икки томонлама ҳамкорлик алоқаларини янада ривожлантириш, уни янги босқичга олиб чиқиш, мураббийлар, ҳакамлар ва терма жамоа спортчилари ўртасида тажриба алмашишга йўналтирилган семинар, ўқув-машғулот йиғинларини ташкил этиш каби бир қатор масалалар муҳокама қилинди.

Мулоқот чоғида Влад Маринеску футбол бўйича Ўзбекистон олимпия терма жамоасини Осиё чемпионатидаги муваффақиятли иштирок ҳамда ўз тарихида илк бор Париж-2024 Олимпиадаси йўлланмасини қўлга киритгани билан табриклади. 

Шунингдек, дзюдочиларимизнинг Гонконг давлатида ўтган Осиё чемпионатидаги иштироки, шунингдек, терма жамоамизнинг 3-5 май кунлари Тожикистон пойтахти мезбонлик қиладиган Душанбе "Катта Дубулға" турнирига тайёргарлик масалалари ҳам кун тартибида бўлди.

Маълумот учун, IJF тақвимидан Париж-2024 Олимпиадасигача Тожикистон ва Қозоғистондаги "Катта Дубулға" мусобақалари ҳамда БАА пойтахти Абу-Даби шаҳрида ўтадиган катталар ўртасидаги Жаҳон чемпионати ўрин олган.