Икки ҳафта давом этган Майами "Мастерс" турнирида чемпион маълум ФОТОГАЛЕРЕЯ

Ҳал қилувчи финал учрашувида дунёнинг учинчи ракеткаси, италиялик Янник Синнер ATP рейтингида 12-поғонадан жой олиб келган болгариялик Григор Димитровга қарши кортга чиқди. Етмиш тўрт дақиқалик баҳсда 22 ёшли Синнер ўзидан 10 ёшга катта тажрибали рақибини деярли сезмади - 6/3, 6/1.

Италиялик теннисчи ўзаро учрашувларда Григорга фақат бир маротаба ютқазган. Қолган учта учрашувда Синнернинг қўли баланд келган. Янник 4, Димитров 6 та эйс зарбасини амалга оширган. Иккала теннисчи ҳам 1 тадан қўшхатога йўл қўйди. Брейклар 4 га 0 кўринишида чемпион фойдасига. 

Cиннер фаолиятидаги 13, "Мастерс" сериясига кирувчи турнирлардаги 2-совринини қўлга киритди. У бугун эълон қилинадиган янги рейтингда дунёнинг иккинчи ракеткаси сифатида дебют қилади. Янник Майамидаги иштирокидан 1000 очко ҳамда 1 миллион 100 минг АҚШ доллари миқдоридаги мукофот пули ишлаб олди. Димитров эса бугун дунёнинг 9-ракеткасига айланади. У 650 очко ва 585,000 долларга эга бўлди.