Икки Нодирбек ҳамда Жавоҳир European Chess Club Cup мусобақасида муваффақиятли ўйнашяпти

Эркаклар ўртасидаги European Chess Club Cup мусобақаси ўз тарихида 39, аёллар иштирокидагиси эса 28-маротаба ўтказиляпти. Бу йилги қитъа кубогида уч нафар гроссмейстеримиз Европа клублари таркибида совринли ўринлар учун дона сурмоқда. 

Гроссмейстерларимиз Нодирбек Абдусатторов ва Жавоҳир Синдаров Руминиянинг "SuperChess", Нодирбек Якуббоев эса Словениянинг "TAJFUN-ŠK Ljubljana" жамоалари шарафини муваффақиятли ҳимоя қилишяпти. 

Кеча 4-турда Нобирбек Абдусатторов ва Жавоҳир Синдаров ўйнаётган "SuperChess" клуби Туркиянинг "Turkish Airlines" жамоасига 2:4 ҳисобида имкониятни бой бериб қўйди. Абдусатторов эронлик Парҳам Мақсудлууни мағлуб этишни уддалади. Синдаров эса Эдиз Гурел билан дуранг ўйнади. Икки ҳинд гроссмейстерлари Гукеш ва Праггнанандҳанинг мағлубияти эса "SuperChess" жамоасига қимматга тушди. 

Нодирбек Якуббоевнинг "TAJFUN-ŠK Ljubljana" жамоаси 4-турда пешқадам "Alkaloid" (Македония) клубига 2,5:3,5 ҳисобида ютқазди. Якуббоев дунёнинг саккизинчи рақамли шахматчиси бўлиб турган хитойлик Вей Йини мағлубиятга учратиб, кичик шов-шув сабабчисига айланди.  

Бешинчи тур олдидан Македониянинг "Alkaloid" жамоаси мусобақада пешқадамлик қиляпти. "Turkish Airlines" жамоаси қўшимча кўрсаткичларга кўра турнир жадвалида 2-ўринни эгаллаб турибди. Яна икки клуб - Tuxera Aquaprofit Nagykanizsai Sakk Klub (Венгрия) ва Novy Bor Chess Club (Чехия) ҳам 4 та турда юз фоизлик натижа қайд этган. 

"TAJFUN-ŠK Ljubljana" ва "SuperChess" жамоалари 4-турга келиб илк мағлубиятни қабул қилиб олишди. Бу клублар 6 очко тўплаган ҳолда турнир жадвалида мос равишда 7 ва 8-ўринларни банд этган. 

Бугун 5-турда "SuperChess" Сербиянинг "SK JAVES Modra" жамоаси билан тўқнаш келади. "TAJFUN-ŠK Ljubljana" клуби эса Черногориянинг "Elektroprivreda" жамоаси билан ҳисоб-китоб қилади.