Илия Топурия ўзини енгил вазн UFC чемпиони деб эълон қилди

"Мен – енгил вазн чемпиониман! Бунга шубҳам йўқ. Акси бўлса, вазнимни алмаштириб ўтирмас эдим. Бу дивизионда мен билан рақобат қила оладиган жангчини кўрмаяпман. Менинг даражамдаги жангчи енгил вазнда йўқ", – деди Топурия Men’s Health Spain нашрига берган интервьюсида.

Шунингдек, Илия нима учун ярименгил вазндаги чемпионлик камарини вакант, яъни эгасиз қолдирганини ҳам тушунтирди.  

"Мен ўзимни мажбурлаб вазнимни ушлаб туришдан маъно кўрмадим. Чемпионлик йўлида кечаю кундуз меҳнат қилаётган йигитлар бисёр. Улар ҳам ўз имкониятларини сабрсизлик билан кутияшпти. Уларнинг орзулари йўлига тўғаноқ бўлишни ўзимга эп кўрмадим. Бу мен томондан худбинлик бўларди. Камаримни топширганим билан мен чемпион бўлиб қолавераман. Ўзимни қироллардек ҳис қилишим учун албатта қўлимда камар бўлиши шарт эмас", – дея сўзларига якун ясади Топурия.

Маълумот учун, Илия Топурия бўшатиб қўйган чемпионлик камари учун Алекс Волкановски ва Диего Лопес келаси ойда ўзаро жанг ўтказишади. Топуриянинг енгил вазндаги рақиби эса икки ҳафтадан кейин расман эълон қилинади.