Индор хоккей: Терма жамоамиз Осиё кубогида бронза медалига эга чиқди

Ушбу нуфузли турнирда ҳам эркаклар, ҳам аёллар терма жамоамиз муносиб иштирок этди. 

Ринат Маматказин мураббийлигидаги эркаклар термамиз ўз гуруҳида Хитой Тайпейи (7:2), Сингапур (2:1) ва Непал (13:2) термаларини мағлубиятга учратиб, фақат Қозоғистон терма жамоасига имкониятни бой берган (1:4) ҳолда гуруҳда 2-ўрин эгаси сифатида ярим финалга йўлланма олди. Ярим финалда “В” гуруҳи ғолиби, спортнинг ушбу тури бўйича қитъада етакчилардан ҳисобланган Эрон термасига ҳам ютқазиб қўйди (1:9). Ниҳоят, 3-ўрин учун Малайзия термасига қарши кечган ўйинда ҳам ҳамюртларимизга омад етишмади (3:6). Шу тариқа эркаклар терма жамоамиз қитъада тўртинчи жамоа номига лойиқ топилди.

Эркаклар ўртасидаги мусобақаларда эронликлар олтин, Қозоғистон кумуш ва ниҳоят малайзияликлар бронза медалига эга чиқишди. Ўзбекистон эркаклар терма жамоаси 4-ўрин билан кифояланди.

Ойбек Патиддинов устозлигидаги аёллар терма жамоамиз ҳам мусобақани кўтаринки руҳда ўтказди. Қизларимиз гуруҳда Непал (9:0), Филиппин (11:0) термаларини йирик ҳисобларда мағлуб этиб, Қозоғистон (2:7) ва Эрон термасига (1:4) имкониятни бой беришди. Тўплар нисбатига кўра гуруҳда иккинчи ўриндан жой олган ҳамюртларимиз ярим финалда таиландликларга кичик ҳисобда (3:5) ютқазиб қўйишди.

3-ўрин учун кечган баҳсда хоккейчи қизларимизга ҳам малайзияликлар рўбарў келди. Учрашувнинг асосий вақтида дуранг қайд этилди, булут бўйича омад ўзбекистонликларга кулиб боқди (1:0). Шу тариқа терма жамоамиз қитъанинг нуфузли мусобақасида фахрли 3-ўринни қўлга киритди.

Аёллар баҳсида бош соврин қозоғистонликларга насиб қилди. Таиланд ва Ўзбекистон терма жамоалари иккинчи ва учинчи ўринларни бўлишиб олди.