Иноуэ вазн тоифасини ўзгартирадими? Наоянинг ўзи бу саволга жавоб берди

Япониялик 32 ёшли боксчи вазнини ўзгартиришга ҳозирча жиддий сабаб кўрмаётганини айтди. 

"Ҳозирча биринчи ярименгил вазн тоифасида қийналмаяпман. Бемалол вазн қила оляпман. Шундан келиб чиқиб айтишим мумкинки, ҳали дивизионда қоламан ва чемпионлик ҳимоя жангларимни давом эттираман", — деди Иноуэ. 

Маълумот учун, 4 май куни америкалик Рамон Карденасни муддатидан аввал мағлубиятга учратган Наоя навбатдаги жангини 14 сентябрь куни Токиода ҳамюртимиз Муроджон Аҳмадалиевга қарши ўтказади. Чарм қўлқоп устамиз айни пайтда вақтинчалик WBA камари соҳиби бўлиб турибди. 

Иноуэнинг кейинги режасида Японияда катта жанг ўтказиш бор. У ватандоши Дзюнто Накатанига қарши рингга чиқишни мақсад қилган. Бу жангга Кунчиқар юртда қизиқиш жуда юқори. 

"Катта эҳтимол билан келаси йилнинг май ойида", — деди Иноуэ Накатанига қарши жанг ҳақида гапириб.