"Интер" клуби 2023 йил ёзида америкаликларга сотиб юборилиши мумкин

"Интер" клуби яқин фурсатлар ичида Америка фонди тасарруфига ўтиши мумкин. Қайд этилишича, Goldman Sachs ва Raine Group банклари анча вақтдан бери ойига 10 млн евро зарарга ишлаётган "Интер" клубини бошқаришда Suning Holdings Group'га ёрдам бера оладиган харидор, энг камида ҳамкор қидиришмоқда. 

Клубнинг сотилиши билан боғлиқ ишлар икки ҳафта ичида олдинга силжиши мумкин. Бунга Америка фондининг "Интер"ни сотиб олиш бўйича музокараларга тайёрлиги сабаб бўлмоқда. Икки томон келиша оладиган бўлса, 2023 йилнинг ёзида "Интер" янги инвесторлар қўлига ўтади. 

"Интер" эгаси Стивен Чжан клубни дастлаб 1 млрд еврога баҳолаганди, аммо "Милан" клуби  RedBird Capital Partners томонидан сотиб олинганидан сўнг, Чжан нархни 1.2 млрд еврога кўтарди. Бироқ, "Интер"га бўлган талабнинг пастлиги сабаб нарх тушиши мумкин.

Маълумот учун, "Интер" клуби 2016 йилдан бери Suning Holdings Group таркибига киради.