Иржи Прохазка кечаги нокаутли мағлубиятига изоҳ берди

Чехиялик аралаш яккакураш устаси кеча АҚШнинг Лас-Вегас шаҳрида ўтган UFC 303 турнирининг марказий жангида дивизионнинг амалдаги чемпиони Алекс Перейрага қарши октагонга чиққанди. Бразилиялик чемпион иккинчи раунднинг 13-сониясидаёқ Иржини нокаутга учратган эди.    

"Ҳамма салом! Аввало, қўллаб-қувватлаганингиз учун раҳмат. Алекс, сенга ҳам жанг учун раҳмат. Сен кеча яхшироқ эдинг. Ҳозир ҳаёлимга келаётган нарса – мен ё янги босқичга кўтарилишим керак ёки фаолиятимни якунлашим. Ҳаммаси оддий. Бу йўл кучли бўлиш учун. Залда кўришамиз!", - дея ижтимоий тармоқдаги саҳифасида мағлубиятига муносабат қолдирган Прохазка.  

Эслатиб ўтамиз, Иржи реванш жангида ҳам мағлубиятга учради. Ўтган йилнинг ноябрь ойида Алекс Перейра Иржи Прохазкани иккинчи раундда техник нокаутга учратиб, яримоғир вазнда вакант бўлиб турган UFC чемпионлик камарини қўлга киритган эди.