Ислам Махачев - Йен Гэрри жангини ким суғурталаши маълум

UFC ярим ўрта вазн тоифаси рейтингида учинчи ўринни эгаллаб турган Майкл Моралес айнан UFC 330 турнири доирасида навбатдаги жангини ўтказишига қарамай, Ислам Махачев - Йен Мачадо Гэрри жангини суғурталайди. 

Бу ҳақда мағлубиятсиз эквадорлик жангчи спорт шарҳловчиси Карлос Легаспига берган интервьюсида маълум қилди.

"UFC менга Ислам Махачев ва Йен Гэрри ўртасидаги жангда кимнидир алмаштиришимни айтди. Лекин ўша куни ўзим ҳам жанг ўтказаман. Тўғри, ҳозир расман рақибим айтилмади. Кимдир Карлос Пратес ҳақида гапирса, кимдир дивизионимиздаги бошқа жангчининг номини тилга олади. Лекин мен: кимни беришлари менга барибир, дедим. Ҳар қандай ҳолатда ҳам 15 августгача вазн қиламан. Ҳар қандай ҳолатда ҳам тарози маросимида вазн ўлчашга чиқаман. Худо хоҳласа менга шу куни камар учун жанг қилиш имконияти берилса, буни бажонидил амалга ошираман", - деди Моралес.

Ўтган ҳафта Карлос Пратес кейинги жанг учун шартнома олганини маълум қилганди. Майкл Моралеснинг баёнотидан келиб чиқиб, ярим ўрта вазн тоифасидаги даъвогар жанг UFC 330 турнирида бўлиб ўтади ва унинг иштирокчиларидан бири ёки иккаласи ҳам асосий тадбирни суғурта қилади, деб тахмин қилиш мумкин.