Истомин ҳам Олимпиадада иштирок этади

Биринчи рақамли теннисчимиз олимпия рейтинг жадвалида кучли 56 нафар теннисчи қаторидан ўрин олди ва тўрт йилликнинг энг йирик спорт байрамида қатнашиш хуқуқини қўлга киритди.
Эслатиб ўтамиз, Денис Истомин 2012 йили Лондон (Буюк Британия)да бўлиб ўтган Олимпиада ўйинларида ҳам яккалик баҳсларда Ватанимиз шарафини муносиб ҳимоя қилган эди.

Дастлабки босқичда испаниялик Фернандо Вердаскони 6-4, 7-6, иккинчи даврада эса люксембурглик Жиль Мюллерни 6-7, 7-6, 7-5 ҳисобида мағлуб этган Денис Истомин, учинчи босқичда швейцариялик Рожер Федерерга 5-7, 3-6 ҳисобида имкониятни бой берган эди. Мазкур Олимпиадада дунёнинг етакчи теннисчиларидан бири Рожер Федерер финалга қадар йўлни мағлубиятсиз босиб ўтган.

Умид қиламизки, Денис Истомин “Рио-2016” ўйинларида ҳам Ватанимиз шарафини муносиб ҳимоя қилади. Бу йўлда унга омад ва зафарлар тилаб қоламиз.