Жаҳон чемпионати. Бугун тўрт полвонимиз гиламга чиқади, уларнинг рақиблари маълум

Бугун “Papp Laszlo Arena” мезбонлик қилаётган жаҳон чемпионатининг олтинчи кунги беллашувларида полвонлар 55, 63, 72 ҳамда 82 кг вазн тоифаларида гиламга чиқишади. Юртимиз шарафини тўрт нафар юнон-рум курашчимиз жаҳон чемпионати медаллари учун баҳсларга киришади. 

-55 кг вазн тоифасида юртимиз спорт шарафини Илҳом Баҳромов ҳимоя қилади. Нанкин ўсмирлар Олимпиадаси ғолиби 1/8 финалдан баҳсларга қўшилади ва бу босқичда у украиналик Александр Трифоновга қарши гиламга чиқади. 

-63 кг вазн тоифасида Ўзбекистон номидан Рио Олимпиадаси совриндори Элмурат Тасмурадов иштирок этади. У илк квалификация беларуслик Сослан Дауров билан тўқнаш келади. 

-72 кг вазнда Ашхободда ўтган Ёпиқ иншоатлардаги Осиё ўйинлари совриндори Арам Варданян ўз имкониятини синовдан ўтказади. Арамнинг илк саралашдаги рақиби украиналик Парвиз Насибов бўлади. Агар у Парвиздан устун келса, 1/8 финалда қозоғистонлик Демеу Жадраев билан рўбарў келади.

-82 кг вазн тоифасида эса Нурбек Хошимбековдан медал кутамиз. У қуръа натижасига кўра биринчи квалификация баҳсларидан курашга қўшилади. Унинг рақиби хитойлик Жун Жиэ На бўлади. Ғолиб чиққан тақдирда нимчорак финалда қирғизистонлик Атабек Азисбеков билан учрашади. 

Эслатиб ўтамиз, жаҳон чемпионатининг биринчи кунги баҳсларида -74 кг вазн тоифасида гиламга чиққан ҳамюртимиз Осиё ўйинлари ғолиби Бекзод Абдураҳмонов терма жамоамизга бронза медалини тақдим этганди. Ҳозирча ана шу медал ягоналигини сақлаб турибди.