Жаҳон чемпионати. Учинчи кунда қайси таэквондочиларимиз жанг қилишади?

Ушбу мусобақада Ўзбекистон терма жамоаси тўлиқ таркиб билан (20 нафар спортчи) иштирок этмоқда. Иккинчи кунги мусобақаларда ўзбекистонлик 5 нафар таэквондочи даянга чиқди. Муҳаммадамин Алиев ярим финалга қадар етиб борди ва бронза медалини қўлга киритди.  

Жаҳон чемпионатининг учинчи кунида Ўзбекистон шарафини қуйидаги 5 нафар таэквондочи ҳимоя қилади. 

-41 кг вазн тоифасида Ўзбекистон шарафини Зафарбек Каримов ҳимоя қилади. Қуръага кўра спортчимизнинг 1/16 финалдаги рақиби озарбайжонлик Пунхан Мурсалов бўлади. Ушбу жанг ғолиби нимчорак финалда Нитхан Бриндамохан (Канада) - Милош Мандич (Сербия) жуфтлиги ғолибига қарши жанг қилади.  

-45 кг вазн тоифасида юртимиз шарафини Назарали Назаров ҳимоя қилади. Ҳамюртимиз Жаҳон чемпионатини 1/8 финалдан бошлайди. Унинг рақиби 1/16 финалдаги Линус Вестерлунд (Швеция) - Хао Чен (Хитой Тайпеи) жангидан сўнг маълум бўлади.  

-44 кг вазнда таэквондочимиз Маржона Худойқулова мусобақани 1/16 финалда украиналик Олександра Лабузовага қарши жанг билан бошлайдиган бўлди. Бу жанг ғолибаси нимчорак финалда филиппинлик Крисриата Каталина Тиу билан тўқнаш келади. 

-55 кг вазн тоифасида ўзбекистонлик Мадина Нуруллаева 1/8 финалда АҚШ вакиласи Мая Матага қарши даянга чиқади. 

-59 кг вазн тоифасида юртимиз шарафини ҳимоя қиладиган Омина Ботирова 1/16 финалда австралиялик Селма Халилович билан тўқнаш келади. Бу жангда ғолиб чиққан спортчи нимчорак финалда латвиялик Анастасия Мочалина билан жанг қилади. 

Ўзбекистон таэквондо WTF Ассоциацияси матбуот хизмати