Жаҳон чемпионатида 1/2 финал жуфтликлари маълум

Кеча оқшом мусобақада чорак финал учрашувлари ўтказилиб, 1/2 финал жуфтликлари маълум бўлди. Драматик кечган Канада - Швеция учрашувида океан орти хоккейчилари ажойиб камбэкни амалга оширишди. Канадаликлар 0:3 ҳисобидаги мағлубиятни ғалабага айлантиришди. Асосий вақтда мувозанатни тиклаган Канада овертаймда ғалаба шайбасини киритишга муваффақ бўлди.  

Чехия терма жамоаси Германияни ортиқча қийинчиликсиз 4:1 ҳисобида енгди. Мусобақа мезбонлари Финляндия терма жамоаси Словакияга қарши ўйинда иродали ғалабани тантана қилди – 4:2. Биринчи бўлимдан сўнг "суоми" 1:2 ҳисобида имкониятни бой бераётган эди. 

Сўнгги чорак финал жуфтлигида АҚШ хоккейчилари Швейцариядан устун (3:0) келишди. Кетма-кет 7 та учрашувда ғалаба қозонган швейцарияликлар шу тариқа жаҳон чемпионатидаги иштирокларини якунлашди.

28 май. 1/2 финал жуфтликлари:

Тампере, "Нокиа-Арена", Финляндия — АҚШ

Тампере, "Нокиа-Арена", Канада — Чехия.

Ярим финал учрашувлари 28 май куни Тампере шаҳрида ўтказилса, 29 май санасида пойтахт Хельсинкида финал ва бронза медали учун ўйинлар бўлиб ўтади.