Жаҳон чемпионатининг бешинчи куни уч дзюдочимизга мухлислик қиламиз, бугун медаль бўлиши керак

Бугун аёллар ўртасида -70, эркакларда эса -90 кг вазн тоифасида беллашувлар ташкил этилади. -90 кг вазнда юртимиз шарафини ҳимоя қилувчи Нурбек Муртозоев ва Шаҳзодхўжа Шарипов яқинда Таиландда ўтган Осиё чемпионатининг финалида ўзаро тўқнаш келишганди ва ўшанда Шарипов ғалаба қозонганди. 

Бундан ташқари, 20 ёшли Шаҳзодхўжа шу йил март ойида Тошкент "Катта Дубулға" турнирида ҳам чемпион бўлган эди. Жаҳон чемпионатининг ортда қолган тўрт куни натижаларига кўра Ўзбекистон терма жамоаси ҳали медаль қўлга киритгани йўқ. Энг яхши натижамиз ҳозирча 5-ўрин бўлиб турибди. Шукуржон Аминова ва Арслонбек Тожиев бронза медали учун кечган беллашувларда рақибларига ютқазиб қўйишган эди.

Бугун курашадиган дзюдочиларимиз: 

-70 кг: Хуршида Раззоқбердиева – Лиао Ю-Жунг (Хитой Тайпейи)

-90 кг: Нурбек Муртозоев – Реми Феуиллет (Маврики)

-90 кг: Шаҳзодхўжа Шарипов – Корнелиус Эйтертсен (Норвегия)

Маълумот учун, бугунги саралаш дастури ҳам бизнинг вақт билан соат 14:00да бошланади.