Жаҳон чемпионатининг учинчи куни 2 та медаль қўлга киритдик, биттаси олтин!

Қувонарлиси, бироз аввал якунига етган учинчи кунги беллашувларда терма жамоамиз аъзолари 1 та олтин, 1 та бронза медалини қўлга киритишди. Бу билан терма жамоамизнинг умумий медаллари 6 тага етди - 4 таси олтин! 

-73 кг вазндаги дзюдочимиз Саъдулла Равшанов бронза медали учун кечган муросасиз беллашувнинг сўнгги сониясида иппон баҳоси эвазига ғалабани ўз томонига оғдириб олди. Бунга қадар у юко баҳоси билан қозоғистонлик рақиби Мирзатай Кидирбайга ютқазаётган эди.

-81 кг вазн тоифасида юртимиз шарафини ҳимоя қилган истеъдодли дзюдочимиз Иномжон Баҳодиров финал беллашувида грузиялик Европа чемпиони, жаҳон рейтингининг 4-поғонасида бораётган Гиорги Мумладзени иппон баҳоси эвазига мағлубиятга учратди. 

Иномжон ўтган йили Перуда ўтган жаҳон чемпионатидаги бронза медалини олтинга айлантирди. У жаҳон рейтингида 15-ўринни эгаллаб турибди.