Жаҳонгир Воҳидов "Oskemen Open 2024" турнири совриндори

Мусобақанинг "Masters" гуруҳида 20 гроссмейстер, 29 халқаро мастерларнинг иштирок этгани баҳсларнинг муросасиз кечишини таъминлади. Арманистонлик гроссмейстерлар Мануэль Петросян (2631) ва Арам Акопян (2617), хитойликлар Сюй Сянюй (2621), Бай Цзиньши (2549), эронлик Бардия Данешвар (2613), ҳиндистонлик Сетураман (2576) ҳамда ҳамюртимиз Жаҳонгир Воҳидов (2572) ғолиблик учун асосий даъвогарлар сифатида эътироф этилганди. 

Ўнта тур давом этган мусобақа якунида Жаҳонгир Воҳидов 10 имкониятдан 7,5 очко жамғариб, қўшимча кўрсаткичларга кўра 3-ўринни эгаллади. Гроссмейстеримиз бронза медали билан бирга 5 200 АҚШ доллар миқдоридаги пул мукофотини ҳам қўлга киритди. У сўнгги турда оқ доналарда ҳаракат қилиб, россиялик Дмитрий Бочаровни таслим этди. Турнирнинг мукофот жамғармаси деярли 50 000 АҚШ долларини ташкил қилди. 

Шахматчиларимиздан Муҳиддин Мадаминов 6,5, Муҳаммадзоҳид Суяров ва Азамат Дауримбетов 5, Баҳром Баҳриллаев эса 4,5 очко жамғаришга муваффақ бўлди. "Masters" турнири ғолиблиги 8 очко тўплаган украиналик Виталий Бернардскийга насиб этди. Жаҳонгир сингари 7,5 очко жамғарган Бай Цзиньши иккинчи ўринни эгаллади.