Жалолиддин "Катта Дубулға" турнирини ғалаба билан бошлади, Гулнозада мағлубият

Дзюдочиларимизнинг бугунги иштирокини истеъдодли ёш дзюдочимиз, 2020 йили ҳам катталар, ҳам ёшлар ўртасида Ўзбекистон чемпиони бўлган Жалолиддин Бойназаров бошлаб берди. -73 кг вазн тоифасидаги дзюдочимиз илк даврада тожикистонлик Беҳрузи Хожазодага қарши баҳс олиб борди. Қўшимча бўлимда Бойназаров томонидан амалга оширилган усул ҳамда унга берилган вазари баҳоси дзюдочимизни иккинчи даврага олиб чиқди. 

Хожазода катталар ўртасидаги жаҳон чемпионатида 5-ўрин, 2019 йилги Тошкент Гран-Присида кумуш, Екатеринбург "Катта Дубулға" турнирида бронза медалини қўлга киритган эди. Бу Жалолиддин учун биринчи катта мусобақа ҳисобланади. Энди Бойназаров иккинчи даврада швециялик тажрибали рақиб Томми Макиасга қарши татамига чиқади.   

Афсуски, -70 кг вазн тоифасидаги тажрибали дзюдочимиз Гулноза Матниязова илк босқичдаёқ мағлубият аламини тотиб кўрди. У германиялик Живонна Скоккимаррога имкониятни бой бериб, мусобақа билан эрта хайрлашди.