Жангга икки ҳафта қолганида Ҳасанбой Дўсматовнинг рақиби ўзгарди (ФОТО)

Мусобақа доирасида ҳаваскор боксда икки карра Олимпиада чемпиони Ҳасанбой Дўсматов Филиппин вакили Ричард Ласпонага қарши баҳс олиб бориши ҳақида хабар бергандик.

Аммо турнирга икки ҳафта қолган бир пайтда Дўсматовнинг рақиби ўзгаргани ҳақида хабарлар тарқалди. Эндиликда андижонлик чармқўлқоп устаси Филиппиннинг бошқа бир боксчиси — Марк Антонио билан тўқнаш келали.

Маълумот учун, 32 ёшли Ҳасанбой ҳозирга қадар проф рингда 6 та жанг ўтказиб, уларнинг барчасида ғалаба қозонган. Юртдошимиз сўнгги жангини 2023 йил ноябрь ойида Россия Федерациясида ЖАР вакили Сипхамандла Баленига қарши ўтказиб, очколар ҳисобига кўра зафар қучганди. 28 яшар Марк Антонио ҳисобида эса 11 та ғалаба ва 2 мағлубият бор.

Таъкидлаш жоиз, Бишкекдаги бокс оқшомида Дўсматовдан ташқари коста-рикалик Дэвид Хименес, қозоғистонлик Сакен Бибосинов ҳамда Париж Олимпиадасида ўзбекистонлик Акмал Ҳасанов мураббийлигида иштирок этган қирғизистонлик Мунарбек Сейтбек Уулу каби таниқли боксчилар қатнашади.