Жанубий кореялик меҳмонлар Ўзбекистон кураш федерациясида бўлишди

Меҳмонлар Тошкентдаги Кураш музейида бўлишиб, курашнинг тарихи ва бугуни ҳақида ҳикоя қилувчи экспонатлар, кураш ҳақидаги маълумотлар билан танишди ҳамда ушбу миллий спортимиз халқаро майдонда замонавий ва истиқболли спорт тури сифатида ривожланиши учун барча имкониятларга эга эканлигини эътироф этишди.

Икки томон ўртасида ташкил этилган ўзаро мулоқотда Ўзбекистон кураш федерацияси раисининг биринчи ўринбосари, замонавий кураш қоидалари асосчиси К.Юсупов курашни спорт тури сифатида халқаро майдонга олиб чиқилиши йўлидаги ҳаракатлар, унинг дунё аренасидаги ривожланиши, тарихи ҳақида сўзлаб берди. Ўз навбатида меҳмонлар Корея миллий спорт тури таэквандони ёзги Олимпия ўйинларига киритилиши борасида олиб борилган ишлар, ҳаракатлар ҳақида маълумот бердилар.

Учрашувда икки томонлама ҳамкорлик меморандуми имзоланди. Ушбу меморандумга кўра, келажакда курашни Олимпия ўйинлари дастурига киритиш учун зарур шарт-шароитлар яратиш, жаҳон ёшларини кураш спорт тури билан шуғулланишга кенг жалб этиш, курашни ўзбек бренди сифатида жаҳон дурдонасига айлантириш ва халқаро нуфузини юксалтириш, мустаҳкамлаш борасида ҳамкорлик қилинишига келишиб олинди.