Жасур Бойқўзиев: "Жаҳон чемпионатида таэквондочиларимиз тарихдаги энг яхши натижани қайд эта оладилар"

Айни кунларда Ўзбекистон терма жамоаси ҳам мусобақага жиддий ҳозирлик кўрмоқда. Терма жамоамиз мураббийлар штабида Осиё ўйинлари чемпиони, жаҳон чемпионати совриндори, тажрибали таэквондочи Жасур Бойқўзиев ҳам фаолият олиб бормоқда. 

Биз олдинда турган жаҳон чемпионати олдидан Жасур Бойқўзиевнинг фикрлари билан қизиқдик. 

"Ҳозирги кунда Ўзбекистон кадетлар терма жамоасида катта мураббий Собир Назаралиевга ёрдамчи сифатида иш олиб боряпман. Спортчи бўлганим учун мураббийлик соҳасида ҳам ўзимни синаб кўрмоқчи бўлдим. Терма жамоага келиб, мураббийлик қандай қийин соҳа эканлигини ҳис қилдим. Сабаби сиз спортчи бўлсангиз фақат ўзингиз учун ҳаракат қиласиз. Мураббий сифатида эса қўл остингиздаги барча спортчига эътибор қаратишингиз лозим бўлади. Тўғрисини айтсам бу жуда қийин экан.  

Спортчи залга келади, белгиланган режа асосида машғулотларини олиб боради ва кейин дам олиши мумкин бўлади. Мураббий эса машғулотлардан сўнг ҳам изланишдан тўхтамаслиги лозим. Сиз олиб борилган машғулотларни таҳлил қилишингиз, турли режалар тузишингиз ва рақибларни ўрганишингиз лозим бўлади. 

Шунинг учун қўлдан келганча кадетлар терма жамоасининг муваффақиятли иштироки учун катта мураббийга ёрдам бериб келяпмиз. Ҳозирги кунда терма жамоамиз сафидаги ёш спортчиларимиз ҳаракатчан ва меҳнатсевар. Ўйлайманки, ушбу жаҳон чемпионатида таэквондочиларимиз тарихдаги энг яхши натижани қайд эта оладилар.

Мусобақанинг ташкилий жиҳатлари ҳақида гапирадиган бўлсам, айни пайтда мазкур мусобақага тайёргарлик жиддий давом этмоқда. Бу борада ташкилий қўмита томонидан катта ҳажмда иш олиб борилмоқда. Ишонаманки, Ўзбекистон бундай тайёргарлик билан жаҳон чемпионатини юқори савияда ўтказа олади", - деди Жасур Бойқўзиев.