ЖЧ-2026 саралаш. Осиё қитъасида иккинчи тур учрашувлари бўлиб ўтди

Қатар мезбонлик қилаётган "А" гуруҳининг иккинчи турида БАА Ўмонга қарши майдонга тушди ва 2:1 ҳисобида ғалаба қозонди. Айни вақтда ушбу гуруҳда БАА 3 очко билан турнир жадвалини бошқариб бормоқда. Қатар ва Ўмон ҳисобида 1 тадан очко бор.

Гуруҳнинг 3-тур ўйини 14 октябрь куни бўлиб ўтади. ЖЧ йўлланмасини қўлга киритиш учун Қатар ушбу баҳсда ғалаба қозониши шарт бўлса, БААни дуранг натижа ҳам қониқтиради.

Саудия Арабистони мезбонлигида ўтаётган "Б" гуруҳининг 2-турида Ироқ Индонезияга қарши майдонга тушди. Учрашув 1:0 ҳисобида ироқликларнинг ғалабаси билан якунланди.

Турнир жадвалида айни вақтда Саудия Арабистони ва Ироқда 3 тадан очко бор ва улар 14 октябрь куни ЖЧ йўлланмаси учун ўзаро баҳс олиб боради. Иккита баҳсда мағлуб бўлган Индонезия ЖЧ йўлланмаси учун курашдан чиқди.