Жек Муловайи: «Баҳодир Жалоловнинг обрўси мени қўрқитмайди»

Хабарингиз бор, Баҳодир Жалолов навбатдаги жангини 10 июнь куни АҚШда бельгиялик Жек Муловайига қарши ўтказади. Муловайи бўлажак жанг ва рақиби тўғрисида гапирди.

«Америкага қайтиш учун яна бир имконият борлигидан жуда хурсандман ва миннатдорман. Бу мен ва карьерам учун қайта кўтарилишдир. 2019 йилда Франк Санчес билан жанг қилганимда қотиб қолдим ва АҚШда жанг қилишга руҳий жиҳатдан тайёр эмас эдим. Охирги мағлубиятимдан кейин тўртта жангда ғалаба қозондим. Рақибимнинг обрўси мени қўрқитмайди. Ким билан жанг қилишимдан қатъи назар, нокаутга интилиш, ҳимоя ҳамда ҳужумда фаол бўлиш менинг услубим. Мен ажойиб жанг кўрсатишни ва жаҳон чемпионати даражасидаги даъвогар эканлигимни исботлашни режалаштиряпман», - деди Жек.