Жейк Пол нималар қилмоқда? Унинг кейинги манзили UFC бўлади(ми?)

Бокс оламига антиқа йўл билан кириб келган Жейк Пол 1997 йил АҚШда дунёга келган. У 2013 йил ўзини блоггерликда синайди ва 2015 йилда You tube’да анчагина мухлисга эга бўлади. Ҳудди шу йилда Жейк Пол Дисней "Paige ва Frankie" каналининг Дирк ролида янги комедия сериясида иштирок этади. 2017 йилда Жейк ижтимоий ахборот воситаларига бағишланган тадбирда оқ уйга ҳам таклиф қилинди. 2017-йилда Пол 1 миллион доллар молиялаштириш билан “Team10” деб номланган ижодий агентлик ишини бошлайди.   

Полнинг боксдаги старти

2020 йилда Жейк Пол акаси Логан билан бирга бокс қоидаларига кўра жанг қила бошлайди. Блоггер Али Эсон Гибга қарши биринчи жангида Пол рақиб устидан нокаут билан ғалаба қозонди. Иккинчи жангда у баскетболчи Нат Робинсон устидан ғалабага эришади. Ушбу жанглардан сўнг, Полнинг иштахаси борган сари очилди. 

Бу билан Жейк тўхтаб қолмади. Унинг кейинги рақиби 36 ёшли собиқ “Беллатор” чемпиони Бен Аскрен эди, у UFC’даги сўнгги 2 жангида ютқазиб, ММА’да фаолиятини якунлаган эди. Ушбу жангда Жейк Пол биринчи раунднинг ўзидаёқ нокаут билан ғалаба қозонди. 2021 йилнинг 29 августда Жейк Пол яна бир UFC собиқ чемпиони Тайрон Вудли билан рингда тўқнаш келди. Бу жанг Пол учун осон бўлмади. Жанг сўнгида ҳакамларнинг қарори эвазига 1-жангда Жейкнинг қўли баланд келди. 2-жангда Пол анча ўсгани ва бекорга “чиранмаётгани”ни исботлади. Жангнинг 6-раундида Тайрон Вудлини “ухлатиб” қўйди. Бу “ухлатиб” қўйгани хатто йил нокаутига давогарлик ҳам қилмоқда.  

Пол UFC’да жанг қилади

Жейк борган сари бежизга блоггерликдан боксга ўтмаганини исботламоқда. У хаттоки UFC президенти Дана Уайтга мурожат қилди. У UFC жангчилари Камару Усман, Масвидаль, Диазлар билан жанг қилиш мақсадида эканлигини яшириб ўтирмади. Агар UFC'да дастлабки жангидаёқ промоушеннинг энг зўр жангчиси Камару Усманга қарши жангга чиқса, у учун энг катта хато бўлади. Сабаби, ҳозирги пайтда Усманни блоггерликдан боксга ўтган йигитча тугул, ҳақиқий UFC жангчилари ҳам мағлуб эта олмаяпти. 

Агар у UFC’да ҳақиқий шоу уюштирмоқчи бўлса, унга UFC собиқ чемпиони Колби Ковингтон яхшигина рақиб бўла олади. Чунки Колби ҳам шоуларни жуда севади. Фақат бунга Дана Уайт қандай қарайди ёки бўлмасам биз Жейкни Хабиб промоушенлиги остидаги EFC’да кўрамизми?  

Хабиб Нурмагомедов агар Пол UFC’да жанг қиладиган бўлса унинг грепплинг мураббийи бўлишини айтиб ўтган. Хўш! Буёғига Жейк нималар қилади? You tube оламидан келиб қолган бу йигитча ўзини ким эканлини жанг оламида ҳам кўрсатмоқда.

Жейк боксда қолса, унинг рақиби ким бўлади?

Жейк Полнинг профессионал бокс фаолияти давом этса, унга Сауль “Канело” Альварес рақиб бўлиши мумкин. Сауль ўз интервюларида боксни севишини ва Полни боксни ҳурмат қилмасликда айблаган эди. Балки Полнинг кейинги жанги айнан Канело билан бўлар?  Полнинг мақсади бокс юлдузларига қарши рингга кўтарилиш. Бу масалада Сауль қандай фикрда? У Пол билан жанг қиладими ёки ўзи айтгандек бокснинг ҳурматига кўз юмадими?  

Катта эҳтимол билан айтиш мумкинки, Пол ҳали-бери тўхташ ниятида эмас. Келаси йилда у қайси йўлни танланлашидан қатъи назар, катта шоу кутиб қоламиз!

Камрон Ҳасанов тайёрлади