Жоэл Диас: "Руслан Абдуллаев келаси йилдаёқ жаҳон чемпиони бўлиши мумкин"

Бу фикрни турли даврларда бешта жаҳон чемпиони билан ишлаган машҳур мураббий, бир неча йилдан бери Калифорниядаги боксчиларимизга устозлик қилиб келаётган Жоэл Диас билдирган.

"Бундай йигитлар боксда ҳар ўн йилда бир марта пайдо бўлади, - деди Диас Абдуллаев ҳақида The Ring нашрига берган интервьюсида. - "Golden Boy" промоутерлик компанияси Русланни келажаги порлоқ боксчи сифатида кўраётгани жуда яхши. Профессионаллар сафида тажрибаси кам бўлишига қарамай, у аллақачон кучли рақиблар билан тўқнаш келмоқда. Бу эса промоутерларнинг унга ишониши ва катта режалари борлигидан далолатдир. Руслан тимсолида катта салоҳиятни кўряпман. У техникаси жуда юқори, кўп қиррали жангчи. Унинг кучли зарбаси бор, ҳужум ва ҳимояда маҳорати ҳам юқори. Абдуллаев жисмонан кучли, чаққон ва ақлли. У келаси йили олтита жанг ўтказиб, чемпион бўлиши аниқ - у аллақачон шу даражага етган".

Келаси ойда 23 ёшни қаршилайдиган Руслан Абдуллаев 2023 йилда -63,5 кг вазн тоифасида жаҳон чемпионатининг олтин медалига сазовор бўлган. У профессионал рингдаги дебютини шу йилнинг март ойида ўтказиб, иккинчи раундда Хосе Алварадо (3-19-1, 2КО)ни нокаутга учратганди. Ушбу мағлубият Алварадо фаолиятидаги илк муддатидан олдинги мағлубият бўлган эди.

Руслан Абдуллаев профессионал боксдаги иккинчи жангида Жино Родриго (13-4-2, 11КО)ни бир овоздан (барча ҳакамлик ёзувларида 80-71) мағлуб этган бўлса, учинчи жангида Кевин Жонсон (12-7, 8КО)дан ҳам ҳакамларнинг якдил қарори билан (80-72, 79-73, 79-73) устун келганди.