Junior European Cup 2025. Японияни ортда қолдирган Ўзбекистон 32 давлат орасида 1-ўринни эгаллади (ФОТО+ЖАДВАЛ)

Дунёнинг 4 қитъаси 32 давлатидан жами 428 нафар дзюдочи қатнашган Европа Кубоги Камол Муродов бош мураббийлигидаги Ўзбекистон ёшлар терма жамоаси учун омадли келди. Дзюдочиларимиз икки кунлик муросасиз беллашувларда 3 та олтин, 1 та кумуш, 2 та бронза медали билан умумжамоа ҳисобида 1-ўринни эгаллади. 

Япония ва Сербия терма жамоалари ҳам биз каби 3 тадан олтин ва 1 тадан кумуш медални қўлга киритишди. Иккита бронза медали якунда умумжамоа ҳисобидаги пешқадамлигимизни таъминлаб берди. Шунинг ўзиёқ Прагадаги турнир қай даражада муросасиз курашлар остида ўтганидан далолат бермоқда. 

Дилшодбек Ҳамроев (-66 кг), Самариддин Мухибиддинов (-81 кг) ва Умида Ниғматова (+78 кг) шарафига Чехия заминида Ўзбекистон давлат мадҳияси янгради. 

Шоҳсупага кўтарилган дзюдочиларимиз:

Олтин медаллар

-66 кг: Дилшодбек Ҳамроев

-81 кг: Самариддин Мухибиддинов  

+78 кг: Умида Ниғматова

Кумуш медаль

+100 кг: Фазлиддин Рафиков 

Бронза медаллар

-60 кг: Самариддин Қўчқоров

-63 кг: Сарвиноз Ҳусанова