Кайла Харрисоннинг бугунги ғалабасидан кейин Аманда Нуньес октагонга қайтишини эълон қилди

Бугун АҚШнинг Нью-Жерси штати Ньюарк шаҳрида рақамланган UFC 316 турнири ўтказилиб, оқшомнинг co main-event жангида аёллар ўртасида ўта енгил вазн тоифаси чемпиони Жулианна Пенья даъвогар Кайла Харрисонга қарши октагонга кўтарилди. 

Жангнинг иккинчи раундида Кайла рақибасини кимура, яъни қўлини оғритиш усули билан мағлубиятга учратиб, янги UFC чемпионига айланганди. Дзюдо бўйича икки карра Олимпиада чемпиони бўлган Харрисоннинг кимура усулини бажаришда айнан дзюдо қўл келган. 

Ушбу тўқнашув якунланиши билан икки вазнда собиқ UFC чемпиони Аманда Нуньес Кайла билан жанг учун ҳам фаолиятини қайта тиклашини эълон қилди. Бразилиялик "шер" UFC`даги сўнгги жангини 2023 йилнинг 10 июнь куни Ирен Алдана қарши ўтказиб, очколар ҳисобига кўра ғалаба қозонганди. Айнан ўша жангдан кейин Аманда фаолиятини якунлаган эди.