14 июн 16:54
Янгиликлар

Бокс/ММА

Кэти Тэйлорнинг хайрлашув жангига чипталар 30 дақиқада сотиб бўлинди

Икки вазн тоифасида жаҳон чемпиони Кэти Тэйлорнинг 5 сентябрь кунги жанги Дублиндаги 82 000 томошабинга мўлжалланган "Крок Парк" стадионида бўлиб ўтади.

Ушбу жангга чипталар сотувга чиққанидан сўнг ярим соат ичида сотиб бўлинган. Яқинда 40 ёшга тўладиган ирландиялик чемпион мағлубият нималигини билмай келаётган франциялик Флора Пили (12-0, 2КО)га қарши фаолиятидаги сўнгги жангини ўтказади.

Тэйлорнинг Пилига қарши жанги 1972 йил июль ойидан бери "Крок Парк"даги биринчи бокс мусобақаси бўлади. Ўшанда Муҳаммад Али ушбу аренада Эл Льюисни муддатидан олдин мағлуб этган эди. Бу аренада бокс оқшомларини ўтказишга унинг юқори ижара нархи ва катта қўшимча харажатлар тўсқинлик қилади. Промоутер Эдди Хирннинг сўзларига кўра, Ирландиянинг энг йирик стадионида тадбирни ўтказиш Лондоннинг "Уэмбли"сига қараганда уч баравар қимматга тушади.