Тимофеева саралаш финалида ютқазди, лекин асосий тўрга чиқди

Мусобақанинг саралаш турнирида мамлакатимизнинг учинчи ракеткаси Мария Тимофеева ҳам ўз омадини синаб кўрди. Вакиламиз саралашнинг 1/2 финалида франциялик Ярослава Барташевични 7/5, 6/1 ҳисобида мағлубиятга учратганди.    

Саралашда бешинчи рақам остида таснифланган Тимофеева асосий тўрга йўлланма берган финал учрашувида рейтингнинг 236-поғонасида бораётган франциялик Хлоэ Пакега қарши кортга чиқди ва афсуски, 3/6, 6/7(5) ҳисобида имкониятни бой бериб қўйди. Хлоэ саралашда тўққизинчи рақам остида таснифланган эди. 

Мағлубиятга қарамай, Мария Тимофеева омадсиз мағлуб (LL) сифатида асосий тўрга йўлланма олди. Ташкилотчилар асосий тўрдаги франциялик теннисчи Элза Жакмонинг ўрнини айнан Мария ҳисобига тўлдиришди. Дунёнинг 59-ракеткаси бўлган Элза жароҳат сабаб мусобақани тарк этди. Бугун Тимофеева 1/16 финалда британиялик Кэти Бултерга қарши кортга чиқади.      

Таққослаш учун, Тимофеева WTA рейтингида 153, Бултер 62-ўринни эгаллаб турибди. Бу теннисчиларнинг ўзаро ўтказадиган илк учрашуви бўлади. Ушбу баҳс бугун бизнинг вақт билан соат 22:30да бошланади.