Кейн Веласкес озодликка чиқиши мумкин

Бу ҳақда UFC’нинг икки вазн тоифасидаги собиқ чемпиони, Веласкеснинг дўсти, ҳозирда телеэксперт ва аралаш яккакурашлар бўйича таҳлилчи бўлиб ишлаётган Даниэль Кормье хабар берди.

"Кейн Веласкеснинг шартли равишда озодликка чиқиш санаси келгуси йилнинг февралига кўчирилди. Келинг, чемпион сўнгги бир неча йил ичида бошидан кечирганларидан сўнг уйига қайтиб, ҳаётини янгидан бошлаши учун илтижо қилайлик.

Уйда бўлган даври мобайнида у ҳеч кимга хавф туғдирмади, фақат мураббийлик билан шуғулланди. Умид қиламанки, бу янгилик унга байрамлар арафасида куч бағишлайди ва у уйга қайтишга тайёргарлик кўради, эҳтимол, кейинги йилнинг бошида. Кейн учун дуо қилишда давом этинг, уни қўллаб-қувватланг", - деди Кормье.

Эслатиб ўтамиз, Кейн Веласкес 2022 йилнинг февраль ойида қиз фарзандини ҳимоя қилиш ортидан қотилликка уриниш ва бошқа бир қатор жиноятларда айбланиб ҳибсга олинганди. MMA’да 43 ёшли америкалик 17 та жанг ўтказган. У 14 ғалаба ва 3 мағлубият қайд этган. 2015 йил июнь ойида Кейн бразилиялик Фабрисио Вердумга ютқазиб, UFC чемпионлигини йўқотганди.