"Китоб челленж" акцияси эстафетасини белбоғли кураш федерацияси раҳбари давом эттирди

Давлатимиз раҳбари ташаббуси билан юртимизда китобхонликка қаратилаётган эътибор ёшларимизда мутолаа маданиятининг юксалишига хизмат қилаётгани аҳамиятлидир. 

Президентимиз томонидан илгари сурилган ушбу хайрли ташаббус туфайли эндиликда мамлакатимизда раҳбар-ходимлар, зиёлилар, ишчи ходимлар ўзлари ўқиган умумий ўрта таълим мактабларига китоблар совға қилишмоқда. 

Хусусан, кеча 20 май куни Ўзбекистон миллий белбоғли кураш федерацияси раиси, белбоғли кураш бўйича UWW (Бутун дунё курашлар олами)нинг халқаро тоифадаги ҳаками Равшан Дастиров Чирчиқ шаҳар, Иқбол маҳалла фуқаролар йиғини ҳудудидаги ўзи ўқиган 18-умумий ўрта таълим мактаби кутубхонасига ўзбек миллий ҳамда жаҳон адабиёти намоёндаларининг сара асарларидан иборат китоблар жамланмасини совға қилди. 

Шунингдек, Р.Дастиров болалигида бошланғич синф ўқитувчиси бўлган Сабоҳат опа Норметова билан ҳам кўришиб, миннатдорчилик сифатида ташаккурнома ва гулдаста  ҳадя этди.    

- Биз мактабимизда билим олиб, кейинчалик жамиятимизда, эл орасида нафи тегадиган, элда эъзоз топган битирувчиларимиз билан фахрланамиз, - дейди мактаб бошланғич синф ўқитувчиси С.Норметова. - Мактабимиз кутубхонасига жисмоний тарбия ва спортни, жумладан миллий спорт турларимиздан бўлган белбоғли курашни мамлакатимизда оммалаштириб, жаҳонга кенг қулоч ёзишида алоҳида ҳисса қўшиб келаётган, менинг бошланғич синфдаги энг фаол аълочи ўқувчим бўлган Равшанжон Дастировнинг бундай хайрли ишларидан жудаям мамнун бўлдик. Шу мактабда ўқиб, таълим олиб, элда обрў топган ўқувчимнинг сара адабиётлар совға қилиши ўқувчиларимизнинг китобга янада меҳр қўйиши ва шу орқали  тасаввур олами, дунё қараши кенгайиб, маънавияти шаклланишига хизмат қилади.

Илҳом РАҲМОНОВ тайёрлади