Колби Ковингтон мағлубияти сабабини очиқлаб, кейинги рақиби ким бўлишини айтди

Ярим ўрта вазн тоифасида UFC камарига собиқ даъвогарнинг айтишича, унинг кечаги мағлубиятига сиёсий қарашлари сабаб бўлган. 

"Ўйлашимча, учинчи, тўртинчи ва бешинчи раундларда ғалаба мен томонда бўлди", - деди "Хаос" жангдан кейинги матбуот анжуманида. - "Рақибим менга ҳеч қандай шикаст етказгани йўқ. Ишончим комил, ғалаба учун бор имкониятимни ишга солдим ва буни уддаладим. Лекин ҳакамлар менга ғалабамни беришни исташмади. Ҳа, ғалаба меники эди. Ҳакамлар ҳамиша мени ёмон кўриб келишган. Улар мендан нафратланишади. Нега? Чунки мен Дональд Трампни қўллаб-қувватлайман. У ҳамиша жангларимни томоша қилиш учун келади. Бугун ҳам Трамп аренада эди. Майли, ҳаммаси ортда қолди. Ҳаёт давом этади". 

Колби Ковингтон кейинги рақиби сифатида ҳамюрти Стивен Томпсонни кўрмоқчи. Кеча у иккинчи раундда Шавкат Раҳмоновга ютқазиб қўйганди. Қозоғистонлик жангчи рақибини бўғиш усули билан мағлубиятга учратган эди. 

"Мен ҳақимда матбуотда ҳамиша бўлмағур гапларни гапириб юрадиган йигит бор – у Стивен "Вандербой" Томпсон. Ҳамма уни яхши йигит деб ўйлайди. У мен ҳақимда кўп гапирган. Истардимки, ўша гапларини октагонга менга айтсин", - деди Ковингтон. 

Эслатиб ўтамиз, Леон Эдвардс ва Колби Ковингтон ўртасидаги чемпионлик жангида британиялик чемпион ҳакамларнинг якдил қарори (49-46, 49-46, 49-46) билан ғалаба қозониб, камарини муваффақиятли ҳимоя қилганди.